Канон Пресвятой Богородице пред иконой «Всех Скорбящих Радость» (2-й)
Пе́снь 1.
Ирмо́с: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.
Мо́ря жите́йскаго волна́ми потопля́емь и напа́стьми лю́тыми одержи́мь, ко приста́нищу устреми́хся невла́емому — покро́ву Твоему́: те́мже мя́ изба́ви, Богоро́дице, от лю́тых.
Положи́ Тя́ приста́нище су́щим в беда́х, Чи́стая, Бо́г, И́же от Тебе́ благоволи́вый восприя́ти пло́ть. Те́мже Ти́, припа́дающе, взыва́ем: да́руй по́мощь Твою́ рабо́м Твои́м.
Еди́на Благослове́нная и Богора́дованная, Я́же Ра́дость челове́ком ро́ждши неизрече́нную, печа́ли отыми́ души́ моея́, молю́ся, и возвесели́ се́рдце мое́.
Изба́ви мя́, Пречи́стая, бесо́вския пре́лести, озлобле́ния же, и вре́да, и искуше́ния, да ве́рою Тя́ сла́влю, су́щую по Бо́зе засту́пницу и покро́в мо́й.
Я́же ненаде́ющихся наде́жда, па́дших исправле́ние, печа́льных утеше́ние, Све́т Боже́ственный ро́ждшая, ду́шу мою́, су́щую во тьме́, просвети́.
Я́ко Гаврии́л Де́ве, прииди́те, ве́рнии, и мы́ вопие́м благогове́йно: вои́стинну укра́шена еси́, Чи́стая, ро́ждшая Ра́дость; ра́дуйся, Благослове́нная.
Пе́снь 3.
Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных и пое́т Тя́ ду́х мо́й.
Ты́ еси́ земноро́дных упова́ние, и по́мощь, и ра́дость, покро́в и прибе́жище, Влады́чице, Ма́ти Живота́. Те́мже Тя́ мо́лим: Твою́ по́мощь низпосли́ все́м пою́щим Тя́, Пречи́стая.
И́же Тобо́ю изба́вльшеся от бе́д и Тебе́ ра́ди ра́дость получи́вше, Ма́ти Безневе́стная, я́ко пода́тельницу благу́ю и засту́пницу благохва́льну вси́ прославля́ем.
Благослове́н Пло́д чре́ва Твоего́, Де́во Богоро́дице, все́х ра́досте, Ра́дость бо всему́ ми́ру родила́ еси́ и весе́лие, разгоня́ющее печа́ль грехо́вную, Богоневе́сто.
Тя́ храни́тельницу, Пресвята́я, в напа́стех стяжа́х; Тебе́ по Бо́зе мою́ предста́тельницу и́мам неусы́пну, Тебе́ да обря́щу, Пречи́стая, избавля́ющую мя́ в де́нь Суда́ вся́каго осужде́ния.
Возвели́чи ми́лость и заступле́ние, Пречи́стая, Твои́х моли́тв на мне́ и изба́ви мя́ от напа́стей и скорбе́й, Ра́дость ми́ру ро́ждшая.
Я́же ра́дости прие́мшая исполне́ние, приими́ от на́с, ра́б Твои́х, целова́ние арха́нгелово: ра́дуйся, Ра́дость ро́ждшая ми́ру; ра́дуйся, ста́мно, из нея́же ма́нна небе́сная все́м ве́рным дарова́ся; ра́дуйся, Благослове́нная.
Седа́лен, гла́с 7:
Ра́дуйся, Со́лнца о́блаче мы́сленнаго и неизрече́ннаго, Влады́чице; ра́дуйся, всесве́тлая свеще́; ра́дуйся, све́щниче всезлаты́й; Тобо́ю, Пресвята́я, Е́ва изба́вися от кля́твы. Но я́ко иму́щая дерзнове́ние ко Благопреме́нному Сы́ну Твоему́ и Бо́гу, ма́тернею моли́твою не оскуде́й о на́с моли́тися, Пречи́стая.
Пе́снь 4.
Ирмо́с: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися богови́дно усмотри́ и со стра́хом славосло́вяше си́лу Твою́.
От вели́ких и разли́чных прегреше́ний же и напа́стей всегда́ спаса́еши мя́, те́мже Тя́ я́ко ро́ждшую Го́спода молю́ и к Тебе́ прибега́ю, непобеди́мей по́мощи скорбя́щим: от бе́д изведи́ мольба́ми Твои́ми.
Бо́же мо́й Милосе́рде, Бо́же Человеколю́бче, Воли́телю ми́лости, ны́не на мя́ изли́й Твою́ ми́лость: мо́лит Тя́ наде́жда и засту́пница моя́, Ма́ти Твоя́.
Ми́лость Твою́ и милосе́рдие на рабы́ Твоя́, Чи́стая, простри́, при́сно моля́щия Тя́, вся́кия ско́рби и му́ки избавля́ющи моли́твами Твои́ми.
Ра́дуйся, кра́сная пала́то Сло́ва, де́вственный черто́же Царя́; ра́дуйся, похвало́ все́х безпло́тных; ра́дуйся, челове́ков ра́досте и по́моще и упова́ние.
Спасе́ние пода́ждь ми́ душе́вное и теле́сное, Пренепоро́чная, и неду́гующему да́руй цельбу́ и лю́тых избавле́ние.
О соде́яниих мои́х лука́вых и прегреше́ниих мно́гих кто́ возмо́жет умоли́ти Судию́, а́ще не Ты́, Чи́стая, еди́на согреша́ющих засту́пнице?
Пе́снь 5.
Ирмо́с: Мра́к души́ моея́ разжени́, Светода́вче Христе́ Бо́же, началоро́дную тму́ изгна́в бе́здны, и да́руй ми́ све́т повеле́ний Твои́х, Сло́ве, да у́тренюя, сла́влю Тя́.
Добро́ту Тя́ Иа́ковлю возлюби́ Бо́г, Де́во Отрокови́це, украша́я вся́ Тобо́ю, омрачи́вшияся преступле́нием пе́рвее.
Ду́шу мою́ сохрани́, я́ко зе́ницу о́ка, под кро́вом крилу́ Твое́ю, Блага́я Пречи́стая, и от духо́в лука́вых томле́ния и муче́ния изба́ви.
Изба́вльшеся Тобо́ю прама́терния печа́ли, Богороди́тельнице, утеше́ния испо́лнени бы́хом, Весе́лие все́м ро́ждшая и всеми́рную Ра́дость, те́мже, Всепе́тая, Твоя́ песносло́вцы от бе́д Твои́ми моли́твами соблюди́.
Благодари́м Тя́, изба́вльшеся Тобо́ю грехо́в мно́гих, и не́мощей, и боле́зней, и неду́г лю́тых, Пречи́стая Влады́чице: наде́жда бо еси́ тверда́ Твои́м ве́рным рабо́м.
С боже́ственным соше́дшеся Гаврии́лом, возопии́м Богоро́дице ве́рно: ра́дуйся, Де́во Свята́я, Благода́тная, Госпо́дь с Тобо́ю, И́же Тебе́ ра́ди, потреби́в печа́ль, подаде́ ми́ру ра́дование.
Боля́щую ду́шу мою́ исцели́, ро́ждшая все́х Взе́млющаго неду́ги, Пречи́стая Влады́чице.
Пе́снь 6.
Ирмо́с: Содержи́ма мя́, приими́, Человеколю́бче, грехи́ мно́гими, и припа́дающа щедро́там Твои́м, я́ко проро́ка, Го́споди, и спаси́ мя́.
В нощи́ и во дни́, я́ве и вта́й под Тво́й прибега́ем кро́в, Пречи́стая Де́во, и́же Тя́ ве́рно славосло́вящии.
В напа́стех засту́пницу Тя́ и́мамы тве́рду, в ско́рбех кре́пкое спасе́ние, поко́й в печа́лех, в беда́х по́мощь, Присноде́во.
Добро́та честны́х святы́х а́нгел, ра́дование челове́к все́х Ты́ еси́, Богоро́дице Де́во: Ты́ мя́ к животу́ наста́ви.
Пала́та Царя́ Сла́вы и огнезра́чный была́ еси́ престо́л, Де́во, херуви́м превы́шши и серафи́м, те́мже Тя́ вся́кое дыха́ние сла́вит, я́ко Ма́терь Зижди́теля.
Ра́дуйся, клеще́ У́гля Боже́ственнаго; ра́дуйся, проро́ков печа́ть и апо́столов похвало́, Пречи́стая Богоро́дице, Ея́же ра́ди от нетле́ния свободи́хомся.
Бе́здну щедро́т ро́ждши, Богоро́дице Де́во, ско́рбных жития́ ду́шу мою́ спаси́ и ра́дости духо́вныя две́ри отве́рзи ми́: на Тя́ бо еди́ну наде́жду возложи́х.
Конда́к, гла́с 6:
Не и́мамы ины́я по́мощи, не и́мамы ины́я наде́жды, ра́зве Тебе́, Влады́чице, Ты́ на́м помози́, на Тебе́ наде́емся и Тобо́ю хва́лимся, Твои́ бо есмы́ раби́, да не постыди́мся.
И́кос.
Простри́ дла́ни Твоя́, и́миже все́х Влады́ку я́ко младе́нца прия́ла еси́, за мно́жество бла́гости; не оста́ви на́с, всегда́ наде́ющихся на Тя́, бо́дренною Твое́ю моли́твою и неисче́тною просты́нею уще́дри на́с, и пода́ждь душа́м на́шим милосе́рдие Твое́, во ве́ки источа́ющи: Тебе́ бо и́мамы, гре́шнии, Засту́пницу от находя́щих на ны́ бе́д и зо́л. Но, я́ко иму́щи милосе́рдия щедро́ты, ускори́ на моли́тву, и потщи́ся на умоле́ние, предста́тельствующи при́сно, Богоро́дице, чту́щих Тя́.
Пе́снь 7.
Ирмо́с: Бо́жия снизхожде́ния о́гнь устыде́ся в Вавило́не иногда́. Сего́ ра́ди о́троцы в пещи́, ра́дованною ного́ю, я́ко во цве́тнице, лику́юще, поя́ху: благослове́н еси́, Бо́же оте́ц на́ших.
Водвори́хомся в ве́чер в пла́чи печа́лей и ча́янии злы́х, но Твои́м боголе́пным кро́вом, Де́во, обоже́ни бы́вше, обрето́хом ра́дость зау́тра: Ты́ бо спасла́ еси́ на́с.
Я́ко боже́ственное прибе́жище покро́в Тво́й, Влады́чице, вси́ стяжа́вше к Бо́гу, в напа́стех и гоне́ниих, и гресе́х к Тебе́ прибега́ем и Тобо́ю измене́ние прие́млем, Пречи́стая.
Гре́шников прибе́жище, низве́рженных исправле́ние Ты́ еси́, Влады́чице: сего́ ра́ди притека́ю к покро́ву Твоему́, спаси́ мя́, Богоневе́сто.
В недоуме́нии и печа́ли сы́й и в беда́х, Пречи́стая, Тя́ призыва́ю те́пле от се́рдца моего́: предвари́, и изба́ви мя́, и пода́ждь, Чи́стая, мне́ утеше́ние.
Благослове́нная Де́во, ра́досте скорбя́щих все́х ве́рных, от вся́каго искуше́ния и печа́ли, и зло́бы зави́дящих мне́ изми́ и от гре́х и разли́чных неду́г мя́ изба́ви.
Вся́ еси́ светоно́сна, Све́т незаходи́мый, Де́во, прие́мши и просвеща́ющи, Чи́стая, ве́рою Тебе́ вопию́щия: Благослове́н, Пречи́стая, Пло́д Твоего́ чре́ва.
Пе́снь 8.
Ирмо́с: На горе́ святе́й просла́вльшася и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся́ ве́ки.
Вся́ еси́ Чи́стая и Боже́ственныя сла́вы испо́лнена, Бли́жняя Моя́, — рече́ Ду́х Бо́жий, Тя́ провозвеща́я, Пречи́стая. Ю́же пе́сньми воспева́ем, пою́ще: тебе́ подоба́ет ра́доватися, Бо́га Челове́ка ро́ждшей.
А́нгелов похвало́ и челове́ков спасе́ние, и спору́чница бу́ди ми́, Ма́ти Бо́жия: я́ко да обращу́ся и прииму́ разреше́ние пре́жде согреше́нных в ве́дении и не в ве́дении.
Тя́ по Бо́зе упова́ние спасе́ния в напа́стех иму́ще, ве́рнии, взыва́ем: вся́ дела́ Госпо́дня, Го́спода по́йте и превозноси́те Его́ во ве́ки.
Приими́ пе́снь от худы́х усте́н, Де́во Всепе́тая, вопию́щих Ти́: ра́дуйся, боля́щим телесе́м врачевство́ и отча́янным душа́м спасе́ние.
В боле́знех и напа́стех одержи́мыя не пре́зри, Блага́я, но мольбу́ худу́ю услы́шавши, свободи́ на́с от скорбе́й вели́ких, да ве́рно Твою́ ми́лость и заступле́ние, Чи́стая, воспева́ем.
Стоя́щих утвержде́ние еси́ и па́дших исправле́ние, Де́во, те́мже мя́, па́дшаго, возста́ви, да Тя́ сла́влю, Благослове́нную и Обра́дованную.
Пе́снь 9.
Ирмо́с: Благослове́н Госпо́дь Бо́г Изра́илев, воздви́гнувый ро́г спасе́ния на́м в дому́ Дави́дове, О́трока Своего́, в ни́хже посети́ на́с Восто́к с высоты́ и напра́вил ны́ е́сть на пу́ть ми́ра.
Ра́дости на́м ве́чныя и жи́зни яви́лася еси́ преесте́ственне, Богороди́тельнице, Хода́таица, Чи́стая, Спа́са все́х ро́ждшая, от лица́ земна́го вся́ку сле́зу я́ве отъе́мшаго и все́м ра́дость пода́вшаго.
Ра́дость и весе́лие, и ра́дование боже́ственное, Де́во неискусому́жная, на́м умно́жися Бо́жие: се́ бо, пла́чущиися лю́те, ра́дуемся моли́твами Твои́ми.
Под Твое́ милосе́рдие прибега́ющии ве́рою избавля́ются ско́рбных бе́д жития́: те́мже и а́з ко Твоему́ покро́ву прибего́х, Богоро́дице.
Псалмы́ Тя́ воспева́ем, Благода́тная, и немо́лчно, е́же ра́дуйся, прино́сим: Ты́ бо источи́ла еси́ все́м ра́дость.
Иска́пающая боже́ственную сла́дость, все́х Сла́дость ро́ждшая, ду́шу мою́ услади́, я́дом змии́ным огорче́нную, отчужда́ющи мя́ го́рькаго вре́да всегда́ хода́тайством Твои́м, предста́тельнице и ра́досте ве́рных, Влады́чице.
Благословя́, благословлю́ Тя́, Пречи́стая, и велича́ю те́пле: благослови́ мя́ у́бо, Твоего́ певца́, и вся́ческих ну́ждных и печа́льных изба́ви, и сохрани́ Твои́ми дла́ньми непобеди́ма.
Свети́лен.
Под кро́в Тво́й, Де́во Госпоже́, прибега́ем вси́ ро́ди челове́честии: просвети́ ны́ све́том Рождества́ Твоего́, гре́шныя рабы́ Твоя́, моля́щияся приле́жно и покланя́ющияся Тебе́, и прося́щия умире́ния ми́рови и душа́м на́шим ве́лия ми́лости.
Источник
Канон Пресвятой Богородице «Всех скорбящих Радость»
Икона Божией Матери «Всех скорбящих Радость» в сравнении с другими является особенно близкой к сердцу верующего человека, ведь множество людей на протяжении всей своей жизни сталкиваются с разными трудностями будь то болезни и слабости, бедность и невзгоды, печали и скорби. При чтении сего канона Заступница всегда спешит к молящимся, даруя надежду, поддерживая в трудных жизненных испытаниях и вытирает слезы плачущим.
Тропарь, глас 4-й
О т святыя иконы Твоея о, Владычице Госпоже Богородице, исцеления цельбы подаются обильно, верою и любовию всем приходящим. Тако и мои немощи посети, и душу мою помилуй Благая, и тело мое исцели благодатию си Пречистая.
Канон, глас 2-й
Песнь 1. Ирмос
В о глубине потопи древле фараонитская вся воиньства преоружену силу. Воплощьжеся Слово, преспеющыя грехи потребило есть, преславныи Господь, яко прославися.
Запев: П ресвятая Госпоже Богородице, услыши молитву раб Своих, молящихся Тебе (поклон) .
И же всем благопослушная в скорби, и в печали помогающи Богородице благая, благодать подаждь пети Тя дерзающим Владычице, скорбящим радости.
Запев. М ногобогатную благодать стяжавши Владычице, дерзновенною си молитвою, преславно изми мя от напастей, убогаго раба Твоего, скорбящим радости.
Слава. О т враг видимых и невидимых избави нас молимся, к Тебе прибегающих Богородице, и разори всяк совет борющих нас.
И ныне. О тъими поношение человеческое, и клеветы наветник от мене Богородице молю Тя, да усердно славлю Господа, Его же доила еси.
Катавасия: С паси от бед рабы Своя Богородице Дево, яко вси по Бозе к Тебе прибегаем, яко к нерушимей стене и заступлению (поклон) . Г осподи помилуй (трижды с поклонами) .
Песнь 3. Ирмос
У тверди нас Собою Господи, древом умерщвеи прегрешения, и страх Твой всади в сердца наша, яко Человеколюбец.
Запев. В рагом наветы разорши суетныя, всепетая Богородице, не оскудей молитвами си, снабдящи нас восхваляющих Тя.
Запев. П ризри Чистая милостивным си оком, и избави мя всякаго навета, видимых и невидимых враг, ослепивши зеницы очес их.
Слава. З лое нападение врагов яко огнь палящии, ищущих всегда погубити нас, Дево росою молитв Твоих угаси.
И ныне. Н еусыпная лампадо, заре присносиятельная, нощию мя скорбей одержима, просвети молитвами си, рождьшая солнце славы Христа. Катавасия.
Слава, и ныне. Седален, глас 2-й. М олитвеница теплая, купно и стена необоримая. Милости источниче, мирови прибежище, прилежно Ти вопием, Богородице Владычице, предвари от бед избавити нас, едина вскоре заступающи.
Песнь 4. Ирмос
У слышах Господи глас Твой иже рече, глас вопиющаго в пустыни. Яко возгреме над водами многими, Твоему свидетельствуя Сыну. Весь быв сущему, Духом же возопи: Ты еси Христос Божия мудрость и сила.
Запев. С пасения Тя мост, и молитву неусыпну, заступление твердо молим Тебе, умилосердися и виждь нашу нестерпимую печаль, болезни, скорби, страсти, и благопременно посети Мати Божия, радость скору подающи.
Запев. Н е непричастни есмы Владычице Твоего заступления скорбящии. Тем же и ныне нам помози вскоре люте обуреваемым, руку простирающи Чистая. Буди милостива болезнем нашим Мати Божия, радость скору подающи.
Слава. Н е уповаша Владычице на Тя беззаконнующии. Но уповаша на язык велеречив, и язык человечь. Присно завистно излиявшеся неправедно пролияти кровь искреняго рыкающе. Ты же Чистая, челюсти их сокруши.
И ныне. С мири Владычице, врагом вознесеную выю велеречующих, советы и нравы их, и сердца поучающуся злым на мя по вся дни. Крепость же и победу подаждь, призывающим Тя Мати Божия. Радость скору подающи. Катавасия.
Песнь 5. Ирмос
У гль Исаии проявлеися, Солнце из утробы девическия восия, во тме заблуждьшим, богоразумия просвещение подавая.
Запев. М олитвенница неложная, упование християном Обрадованная, приими мольбы наша, прилежно призывающих, и молящихся Тебе.
Запев. И сточник Тя жизни сущю Чистая, безсмертия источающу воды, земленородным разумевше ублажаем.
Слава. В ооружися на ны лукавно враг, языком яко же мечем погубити хотя. Но Твоею Богородительнице крепостию предвари.
И ныне. П учину Чистая заступлением, кто изочтет силы Твоея, тем же нас сущих в нужи, скоро предвари. Катавасия.
Песнь 6. Ирмос
В бездне греховней одержимь, неизследную милосердия Твоего призываю бездну, от тли Боже мя возведи.
Запев. Ц еломудрию сущи ходатаица, призывающим Тя ныне явися, и от всяких избави напастей и бед Богоневесто.
Запев. З лодейства вражия разори, и клеветы неправедныя устави, благословенная Пречистая, избавляющи неповинныя от скорби.
Слава. Л ютыми грехи окружени, и напастными бедами потопляеми, под божественыи покров Твой прибегаем Мати Христа Бога.
И ныне. Н еискусомужно рождьши Господа, явися по рожестве паки девствующи. О, преславному чюдеси, иже в Тебе соделанному, Богоневесто. Катавасия.
Слава, и ныне. Кондак, глас 6-й. Н е имамы иныя помощи, не имамы иныя надежди, разве Тебе Владычице, Ты нам помози. На Тебе ся надеем, и Тобою ся хвалим, Твои бо есмы раби, да ся не постыдим.
Другии кондак, глас той же. З аступнице християном непостыдная, ходатаице к Творцу непреложная, не презри грешных моления гласы. Но предвари яко Блага на помощь нашу, верно вопиющих Ти, ускори на молитву, и потщися на умоление, заступающи присно Богородице чтущих Тя.
Икос. П ростри длани Свои, има же всех Владыку яко Младенца прият, за множество благости, не остави нас всегда надеющихся на Тя. Бодреною си молитвою, и неисчетною простынею ущедри нас, и подаждь душам нашим милосердие Свое во веки источающи: Тебе бо имамы грешнии заступницу, от находящих на ны бед и зол. Но яко имущи милосердия щедроты, ускори на молитву, и потщися на умоление, заступающи присно Богородице чтущих Тя.
Песнь 7. Ирмос
Д а преславное рожество Ти Христе, еже от Девы прообразиша яве, неопалимы в пещи дети сохранил еси, песньми поюща: отец наших Боже благословен еси.
Запев. О , благоутробию Ти Дево чистая, решиши бо безмерныя печали и напасти, призывающим в нужди и обстоянии. Тем же и ныне помози благословеная, иже Тя восхваляющим.
Запев. П окажи скорое си заступление, покажи яко можеши яко Мати Богу, призываем от сердца со слезами припадающе, скорбь укроти и болезнь рабом Твоим вскоре.
Слава. У ста человеком яко львом лютым, гроба тяжчайше отверзошася, горько поглотити мя. Но Ты Богородице явися надежа ненадеющимся, и низложи крепость их благословеная.
И ныне. Д а узрят врази и постыдятся, да разумеют и видят Твою еже по нас, сопротив борющую силу. И в пропасть преисподнюю низложи их благословеная, надеже ненадеющимся. Катавасия.
Песнь 8. Ирмос
В пещь огненую, к детем еврейским сошедшаго, и пламень на хлад преложшаго Бога, пойте вся дела Господа, и превозносите Его во веки.
Запев. П рибежище наше и миру радование Богородительнице, умилосердитися потщися оскорбленым, спешно благодать Твою подаждь нам, и заступи Благая Своя рабы.
Запев. С овет суетен совещаша люте на ны, безбожных сонмища, яко же прежде Ахитофел. Но вопием, Твоими молитвами сии разори, низложши сих крепость Богородице.
Слава. И же призывающих Тя Богородице от души неложно, во всякой скорби, и в болезнех различных и бедах лютых, спешно услыши Владычице, сих избавляющи присно молитвами си.
И ныне. Д а имя Твое Богородице на земли славословится, иже из Тебе восияв, грешником державную надежу, и стену дарова Тя. Тобою бо всяко дыхание Богови притекает. Катавасия.
Песнь 9. Ирмос
Н едоумеет всяк язык хвалити Тя достойно. Ни зумеет же ум премирныи пети Тя Богородице, вся бо Блага сущи веру приими. Ты бо любовь веси Божию нашу. Ты бо християном заступница, Тя величаем.
Запев с поклоном. Д а заградится всяк язык лукавым поучаяися. Да молчат устны льстивыя, и уста неправедно глаголющая, на праведнаго беззаконие, гордынею и завистию вражебною вкупе, Богородицы молитвою и святых Христовых.
Запев. И же в молитвах бодрую чистую Богородицу, призываем вси, болезнию и скорбию одержимии, взывающе Владычице чистая. Скоро избави от одержащих болезней рабы Твоя присно, яко по Бозе заступницы иныя не имамы.
Слава. О тчаявшымся велие прибежище еси, обуреваемым тихое пристанище Богородице. Тем же и мы притекаем благодаряще, да не постыдимся Мати истиннаго Живота. Да благодаряще усердно Тя величаем.
И ныне. П риими Отроковице пречистая божественую песнь, воздавающи благодать на Тя надеющимся. И мир испроси Церквам присно послати. И державе нашей одоления и победы, да христианскии всяк язык Тя величает. Катавасия.
Задостойник: В ладычице приими молитву раб Своих, и избави нас от всякия нужды и печали. Ты еси Богородице, оружие наше и стена. Ты еси заступнице, и к Тебе прибегаем, Тя и ныне на молитву призываем, да избавиши ны от враг наших. Возвеличим Тя вси пренепорочную Матерь Христа Бога нашего, Юже осени Дух Пресвятыи.
Отпуст: Г осподи Исусе Христе Сыне Божии, молитв ради пречистыя Твоея Матере, честнаго и славнаго явления чюдотворныя иконы Ея «Всём скорбящим радость», и всех святых, помилуй и спаси нас, яко Благ и Человеколюбец. А минь.
Библиотека. Архив «Русской веры»
Библиотека нашего сайта — это уникальная коллекция материалов, жемчужиной которого является «Лицевой летописный свод Ивана Грозного». Кроме того, в библиотеке впервые размещён старообрядческий Архив Канцелярии архиепископа Московского и Всея Руси (РГАДА, фонд 1475).
Источник